Sparkar i gang "KiK 2010"

-Søndag vert det opning av det som truleg er eit av dei største kunstprosjekta som har vore i kommunen - "Kunst i kyrkja" (KiK), fortel Carsten Wind Hansen, Berith Hatlestad, Dorthe Stølen og Maria Borlaug, som alle er med i KiK 2010, til Ytre Sogn.

Tema for kunstprosjektet, som går over ein heil månad, er "Ei reise i vatn.
-Det er lagt opp til ei sansereise i vatn, som byrjar utanfor kyrkja. Når folk kjem nedst i kyrkjetrappa, går dei gjennom ein tunnel med dekorasjonar frå livet i havet. Barnehagar og skular i heile kommunen har vore med og laga det, fortel Carsten Wind Hansen, Berith Hatlestad, Dorthe Stølen og Maria Borlaug i prosjektgruppa KiK 2010 til Ytre Sogn.
Når folk kjem opp trappa ventar ei ny oppleving, denne gongen i lyd og lys, utforma av ungdomsskule, vidaregåande skule og kunstnarar. Innanfor kyrkjedøra vert folk så møtt av ei fotoutstilling, før dei går gjennom installasjonar som Dalestova har laga.
-Reisa endar i sjølve kyrkjerommet, som vil vere fylt med kunst og musikk, seier dei fire.

Prosjektet KiK 2010 har vore jobba med det siste året, og over 50 personar har vore involvert.
-Det gjer det til eit av dei største kunstprosjekta som har vore i kommunen, seier Borlaug, og peikar på at 25-30 kunstnarar som alle har tilknyting til Høyanger er mellom dei som bidreg med alt frå skulpturar og måleri, til keramikk og fotografi.

Det omfattar ei rekkje arrangement i perioden 7. mars til 5. april. I tillegg til sjølve utstillinga vert det i vekene som kjem både konsert med Høyanger Vocalis, litteraturkveld med Bjørnson som tema og tibetansk meditasjonskveld.
Forteljarkveldar vert det også fleire av.
-Det siste inneber at vi har tre forteljarar i kyrkja, som les eventyr for barn. Det kjem vi til å ha fleire gonger i veka framover, slik at mellom anna barnehagar og skular får høve til å oppleve det. Første gongen vert allereie same kvelden som opninga av KiK 2010, det vil seie no på søndag, seier Wind Hansen.

Les meir i papirutgåva