Ungdomsbedrifter ved Høyanger vidaregåande skule har fått oppdraget med å montere opp utstillinga «Ei reise i vatn», som er ein del av 50-årsmarkeringa til Høyanger kyrkje.
Skrive av: May Britt Eide (05.03.10 - 12:01)
Tysdag ettermiddag var arbeidet med utstillinga, som vert opna søndag, i full gang.
-Vi tykkjer at oppdraget er spennande, og heilt annleis enn det vi elles har prøvd oss på gjennom skuleåret, seier Yvonne Hut Systad og Malene Raasholm Mo, som begge er elevar ved elektrolinja på Høyanger vidaregåande skule - og med i ungdomsbedrifta Elekto UB. Dei var mellom dei i alt 12 elevane ved linja som deltok i arbeidet med å montere opp ialt 22 spottar til dei mange bileta som etter kvart skal opp på veggane i kyrkjerommet.
-Vi reknar med at det vil ta både ettermiddagen og kvelden innan vi er ferdige, seier dei to til Ytre Sogn, og kan samstundes fortelje at det var ein del uvisse knytt til sjølve gjennomføringa på førehand.
-Vi var usikre på kor vidt murveggane i kyrkja ville tole at vi først bora i dei, for så å strekkje waier mellom punkta vi skal ha spottane, seier Hut Systad og Raasholm Moe, og peikar på at spottane er relativt tunge.
-Men det ser ut til å gå bra, seier dei. -Og kva trur de om sjølve utstillinga?
-Den blir nok bra, den også, seier dei, og fortel at dei har sansen for prosjektet med å bruke kyrkja til å vise fram ulik kunst.
-Kyrkja vert brukt på ein annan måte enn den elles vert, og det tykkjer vi er spennande, seier dei to elevane ved Høyanger vidaregåande skule.
|
|
